മോഹിപ്പിക്കും മോഹനം

സംഗീത വിദ്യാര്‍ഥികള്‍ ആദ്യമായി പഠിക്കുന്ന രാഗം പൊതുവില്‍ മായാമാളവഗൌള ആണെങ്കിലും ഇത് ഒരു പഠനമല്ലാത്തത് കൊണ്ട് വിശേഷപ്പെട്ട ഒരു രാഗം ശ്രദ്ധിക്കാം ..

രാഗം മോഹനം..

പേര് പോലെ തന്നെ ആരെയും മോഹിപ്പിക്കുന്നതാണീ രാഗം.. ഈ രാഗം അറിഞ്ഞും അറിയാതെയും ഇഷ്ടപ്പെടാത്ത ആരും തന്നെ കാണില്ല.....അത്ര മനോഹരമാണിത്.....സംഗീതത്തില്‍ ഏഴു സ്വരങ്ങളെ കൊണ്ടുള്ള മാന്ത്രികതയാണല്ലോ.....എന്നാല്‍ ഈ ശ്രവണസുന്ദരമായ രാഗത്തില്‍ അഞ്ചു സ്വരങ്ങള്‍ മാത്രമേ ഉള്ളൂ...

28 - മത്തെ മേളകര്‍ത്താ  രാഗമായ ഹരികാംബോജിയില്‍ ജന്യമാണ് മോഹനം...ഹിന്ദുസ്ഥാനിയിലെ ‘’ഭൂപ്’’ എന്ന രാഗമാണ് ഇതിന്റെ സമാന രാഗം..

ഈ രാഗത്തില്‍ മാധ്യമം , നിഷാദം എന്നീ സ്വരങ്ങള്‍ ഇല്ല......ആരോഹണത്തിലും അവരോഹണത്തിലും അഞ്ചു സ്വരങ്ങള്‍  വീതം വരുന്നത് കൊണ്ട് ഈ രാഗം ഒരു ഔഡവ - ഔഡവ രാഗം ആണ്..( ആറ് സ്വരങ്ങള്‍  വീതം വന്നാല്‍  ഷാഡവ രാഗം എന്ന് പറയും...ആരോഹണത്തില്‍ അഞ്ചും അവരോഹണത്തില്‍ ഏഴും സ്വരങ്ങള്‍ വന്നാല്‍  ഔഡവ - സമ്പൂര്‍ണ്ണ രാഗം എന്നിങ്ങനെ പല തരങ്ങള്‍ ഉണ്ട്.)...ഔഡവ എന്നാല്‍  അഞ്ചിന്റെ എന്നാണു അര്‍ത്ഥമാക്കുന്നത്..


ആരോഹണം : സ രി2 ഗ3 പ ധ2 സ… S R2 G3 P D2 S
അവരോഹണം : സ ധ2 പ ഗ3 രി2 സ…. S D2 P G3 R2 S


നോട്സിനെ കുറിച്ച് മുമ്പ് പറഞ്ഞിട്ടുണ്ട്..എന്നാലും ഒരിക്കല്‍ കൂടി പറയാം...
ഷഡ്ജം , ചതുര്‍ശ്രുതി ഋഷഭം , അന്തര ഗാന്ധാരം , പഞ്ചമം , ചതുര്‍ശ്രുതി ധൈവതം

ഒരുപാട് സഞ്ചാര സ്വാതത്ര്യം ഉള്ള ഒരു രാഗമായതിനാല്‍  രാഗത്തിനുള്ളില്‍ തന്നെ നിന്ന് കൊണ്ട് ഒട്ടേറെ വൈവിധ്യങ്ങള്‍  വരുത്താന്‍  കഴിയും....ഒരുപാട് കൃതികളും ഗാനങ്ങളും ഈ രാഗത്തില്‍  വന്നിട്ടുണ്ട്..എത്ര കേട്ടാലും വീണ്ടും വീണ്ടും കാതില്‍ ധ്വനിക്കും ഈ രാഗം ........പല രാഗങ്ങള്‍ക്കും അതിന്റെ സ്വരങ്ങള്‍ക്കും ഭാവത്തിനും ഒരു തരം  നിഗൂഡ ഭാവം ഒളിഞ്ഞു കിടപ്പുണ്ടാവും........മിക്കതും എത്ര പാടിയാലും അതിന്റെ ഭാവത്തിന്റെ ഏതാനും അംശമേ പുറത്തു കൊണ്ട് വരാന്‍ കഴിയുകയുള്ളൂ......തോടി പോലുള്ള ഘനരാഗങ്ങള്‍ അതിന്റെ സ്വരങ്ങളിലൂടെ സഞ്ചരിച്ചാല്‍ ഭാവം മനസ്സിലാകണമെന്നില്ല ........എന്നാല്‍ വെറും സ്വരസ്ഥാനങ്ങളിലൂടെ ഒന്ന് പോയാല്‍ പോലും മോഹനം ഫീല്‍ ചെയ്യും.............അതിന്റെ വാതിലുകള്‍ എല്ലാം മലര്‍ക്കെ തുറന്നിട്ടിട്ടുള്ളത് തന്നെയാണ്.....ഗമകങ്ങള്‍ ചേര്‍ത്തുള്ള ആലാപനത്തിന് മോഹനത്തിന്റെ പൂര്‍ണ്ണഭാവം കൊണ്ട് വരാന്‍ കഴിയും........അത്യാവശ്യം മൂളാന്‍ അറിയുന്ന ഒരാള്‍ക്കും പെട്ടെന്ന് ഒന്ന് ശ്രമിക്കാനും മോഹനത്തില്‍ സാധ്യതകള്‍ ഉണ്ട്........എത്ര പാടിയാലും എത്ര കേട്ടാലും മതി വരുകയില്ല ഈ മനോഹര മോഹനം........

രാഗച്ഹായാ സ്വരങ്ങള്‍ ......രി , ഗ , ധ....( രാഗത്തിന്റെ ജീവന്‍/ഭാവം തന്നെ എടുത്തു കാണിക്കുന്ന സ്വരങ്ങള്‍)....


ഈ രാഗത്തിലെ പ്രധാന കൃതികള്‍ ഇവിടെ കൊടുക്കുന്നു.......((ഒരുപാടുണ്ട്........

എങ്കിലും ഇവിടെ അല്പം )

വരവീണാ - ഗീതം - പുരന്ദര ദാസര്‍.......

നിന്നുകോരി - വര്‍ണം - ശ്രീനിവാസ അയ്യങ്കാര്‍ ....

പരിപാഹിമാം - കീര്‍ത്തനം - സ്വാതിതിരുനാള്‍

മോഹന രാമാ - കീര്‍ത്തനം - ത്യാഗരാജ സ്വാമികള്‍

നന്നു പാലിംപാ - കീര്‍ത്തനം - ത്യാഗരാജ സ്വാമികള്‍

രാമാനിന്നു - കീര്‍ത്തനം - ത്യാഗരാജ സ്വാമികള്‍

കാദംബരി പ്രിയ - കീര്‍ത്തനം - ദീക്ഷിതര്‍ 

സദാ പാലയ - കീര്‍ത്തനം - ജീ എന്‍ ബാലസുബ്രഹ്മണ്യം

പരിപാഹിമാം - കീര്‍ത്തനം - സ്വാതിതിരുനാള്‍

സ്വാഗതം കൃഷ്ണാ - ഊത്തുക്കാട് -

കാപാലി - പാപനാശം ശിവന്‍ -

പ്രഭാതരാഗമായി അറിയപ്പെടുന്ന മോഹനത്തിന്  യഥാര്‍ത്ഥത്തില്‍ ഒരു കാലവിശേഷത്തിന്റെ ആവശ്യമില്ല..........എപ്പോള്‍ വേണമെങ്കിലും നമ്മുടെ മൂഡ്‌ മാറ്റിയെടുക്കാന്‍ ഇതിനു കഴിയും.........ഈ രാഗം മനസ്സിലാകാന്‍ കീര്‍ത്തനങ്ങളും അതില്‍ ചെയ്തിട്ടുള്ള ലളിത/ചലച്ചിത്ര ഗാനങ്ങളും കൂടുതല്‍ ആയി കേള്‍ക്കുക.......പിന്നെ ഓരോ ഗാനവും  പൂര്‍ണ്ണമായി ഒരു രാഗത്തില്‍ തന്നെ ആകണമെന്നില്ല....വരികള്‍ക്കും സുഖത്തിനും സിനിമയിലെ ഭാവത്തിനും മറ്റും വേണ്ടി ഒരു രാഗത്തില്‍ ഇല്ലാത്ത സ്വരങ്ങളും പല സംഗീത സംവിധായകരും  ചേര്‍ക്കാറുണ്ട്...സാധാരണയായി ഇന്ന രാഗത്തില്‍ പാട്ട് ചെയ്യുക എന്ന ശീലം പൊതുവില്‍ കുറവാണ് ...ഈണമിട്ടതിന് ശേഷം പല്ലവിയില്‍ വന്ന  രാഗം  ആ പാട്ടില്‍ തന്നെ തുടരുകയാണ് പതിവ് ....ഒരു ഗാനത്തില്‍ 80-85% ശതമാനത്തില്‍ കൂടുതല്‍ ഒരു രാഗം ഉപയോഗിചിട്ടുന്ടെങ്കില്‍ സാധാരണയായി നമ്മള്‍ ആ ഗാനം ഇന്ന രാഗത്തില്‍ ആണെന്ന് പറയുന്നു..........
എണ്ണിയാലൊടുങ്ങാത്ത സിനിമാഗാനങ്ങള്‍ ഈ രാഗത്തില്‍   ഉണ്ട് ...രാഗഭാവം എളുപ്പത്തില്‍  മനസ്സിലാക്കാന്‍  കുറച്ചു ഗാനങ്ങള്‍ ഇവിടെ പരിചയപ്പെടുത്തുന്നു..

സ്വര്‍ഗ്ഗപുത്രീ നവരാത്രീ - നിഴലാട്ടം
ഗുരുവായൂരമ്പല നടയില് - ഒതേനന്റെ മകന്‍ 

സംഗീതമേ ജീവിതം - ജയില്‍ പുള്ളി
മാലിനി നദിയില്‍  - ശകുന്തള
ഏഴരപ്പൊന്നാന - അക്കരപ്പച്ച
നീലഗിരിയുടെ - പണി തീരാത്ത വീട്

കാര്‍മേഘ വര്‍ണ്ണന്റെ - സാഗര സംഗമം
യമുനേ നിന്നുടെ നെഞ്ചില്‍  - യാത്ര
മഞ്ഞള്‍ പ്രസാദവും - നഖക്ഷതങ്ങള്‍ 

ആരെയും ഭാവ - നഖക്ഷതങ്ങള്‍
സ്വപ്നങ്ങളൊക്കെയും - കാണാന്‍  കൊതിച്ച് 

ഓര്‍മ്മകള്‍ ഓടിക്കളിക്കുവാന്‍  - മുകുന്ദേട്ടാ സുമിത്ര വിളിക്കുന്നു
ചന്ദനലേപസുഗന്ദം - ഒരു വടക്കന്‍  വീരഗാഥ
മേടമാസ പുലരി - മിണ്ടാപൂച്ചക്ക് കല്യാണം
അറിവിന്‍  നിലാവേ - രാജശില്പി
ആറ്റിറമ്പിലെ കൊമ്പിലെ - കാലാപാനി
ഏതോ നിദ്ര തന്‍  , കുപ്പിവള കില് കിലെ - അയാള്‍ കഥ എഴുതുകയാണ്
നീ എന്‍  സര്‍ഗ സൌന്ദര്യമേ - കാതോട് കാതോരം
കണ്ണാടി കൂടുംകൂട്ടി - പ്രണയ വര്‍ണങ്ങള്‍ 

മൌലിയില്‍  മയില്‍പീലി - നന്ദനം

ചക്കര മാവിന്റെ - അത്ഭുത ദ്വീപ്....(നാടന്‍ ശീലുകളുടെയും നമ്മുടെ നാട്ടില്‍ നിലനിന്നിരുന്ന നാടന്‍ പാട്ടുകളുടെയും ട്യൂണ്‍ ആണിത്.......അവ ഉപയോഗിച്ച് കൊണ്ടുള്ള രസകരമായ ഒരു കമ്പോസിഷന്‍)
എന്താണെന്നെന്നോടോന്നും - ഗോള്‍
മുടിപ്പൂക്കള്‍ വാടിയ്യാലെന്തോമനെ - ആല്ബം - രവീന്ദ്രന്‍  മാസ്റ്റര്‍
മഞ്ഞില്‍ കുളിക്കും - വെറുതെ ഒരു ഭാര്യ.......ലളിതമായ മോഹനത്തില്‍ ചെയ്തത്.....(ഏതു ഫീലും കൊണ്ട് വരാന്‍ കഴിയും )
ഓമനേ നീയോരോമല്‍ - ഗാനമേള - രവീന്ദ്രന്‍...(മോഹനത്തിലെ ഒരു വിരഹ ഗാനം)......  

വിവിധ രാജ്യങ്ങളിലെ വ്യത്യസ്തങ്ങളായ സംഗീതത്തില്‍ മോഹനം ഉണ്ട്....നോര്‍വീജിയന്‍ സംഗീതത്തില്‍ മോഹനത്തിന് സമാനമായ സ്വരങ്ങള്‍ ഉപയോഗിച്ചുള്ള സംഗീതം ഉണ്ടായിരുന്നു .......ചൈനീസ്/ജാപ്പനീസ് ഭാഷയിലും ഈ രാഗത്തിന് സമാനമായ സ്വരങ്ങള്‍ ഉണ്ടെന്നു മനസ്സിലാക്കിയിട്ടുണ്ട്..............

ഇല്ലിക്കാടും... - ഏഴരക്കൂട്ടം - ചൈനീസ്/ജാപ്പനീസ് ബെയ്സില്‍ ചെയ്ത മോഹനത്തില്‍ ഉള്ള ഒരു ഗാനം.......ഈ കമ്പോസിഷന്‍ തീര്‍ച്ചയായും കേള്‍ക്കുക.......

ഇങ്ങനെ ലക്ഷക്കണക്കിനാണ് മോഹനത്തിലെ ഗാനങ്ങള്‍..........ഇത് വായിച്ചു കഴിയുമ്പോള്‍ മോഹനത്തെ കുറിച്ച് അറിയാവുന്ന ഓരോരുത്തര്‍ക്കും ഇഷ്ടം പോലെ ഉദാഹരണങ്ങള്‍ ഓര്‍മ വരും.........ഓര്‍മ വരാതെയിരിക്കുന്നതെങ്ങിനെ?.........വെണ്മതി  എന്ന് തുടങ്ങുന്ന പഴയ തിരുവാതിരക്കളി പാട്ട് പലര്‍ക്കെങ്കിലും ഓര്‍മ ഉണ്ടാവും....അതിന്റെ ട്യൂണില്‍ ചെയ്ത പാര്‍വണേന്ദു  മുഖി എന്ന പരിണയം സിനിമയിലെ ഗാനവും മോഹനം തന്നെ........ഓരോ സംഗീത സംവിധായകരും അവരുടെതായ ശൈലിയില്‍ മോഹനത്തെ അവതരിപ്പിച്ചിട്ടുണ്ട്........അതില്‍ തന്നെ ഏറ്റവും മികച്ചവ വന്നിട്ടുള്ളത് ദേവരാജന്‍ മാസ്റ്റര്‍, രവീന്ദ്രന്‍ മാസ്റര്‍ , ബോംബെ രവി തുടങ്ങിയവരില്‍ നിന്നും ആണ്.........ദക്ഷിണാമൂര്‍ത്തി സ്വാമികളുടെ ''ചന്ദ്രികയില്‍ അലിയുന്നു ചന്ദ്രകാന്തം''ആര്‍ക്കെങ്കിലും മറക്കാന്‍ കഴിയുമോ?........ക്രിസ്തീയ സിനിമാ ഭക്തിഗാനമായ ''വാതില്‍ തുറക്കൂ നീ കാലമേ'' മോഹനത്തിന്റെ വരമാണ്...........

കഥകളിയില്‍ വീരരസം പ്രകടിപ്പിക്കാന്‍ മോഹനം ഉപയോഗിച്ചിരുന്നു എന്ന് കേട്ടിട്ടുണ്ട്.........


മറ്റൊരു രാഗവുമായി ഇനിയും കാണാം ( തുടരും )

സുജിത് സുട്ടൂ ....